Шокшо вӱдым кок гана чарат
Тений Йошкар-Олаште шокшо вӱдым олан тӱрлӧ ужашыштыже тӱрлӧ жапыште чарат. Профилактикае паша кок этап дене эрташ тӱҥалеш. 23-шо май гыч 2-шо июнь марте Западный, Березово, Гомзово микрорайонлаште, Октябрьский уремысе 9-ше, 9-ше а, 9-ше б номеран пӧртлаште шокшо вӱд огеш лий. 14-ше июнь гыч 24-ше июнь марте шокшо вӱдым рӱдолан Заречный ужашыштыже, Ширяйковышто, тыгак Эшпай урем деч тӱналын, Сомбатхей могырышкыла верланыше пӧртлаште йӧрыктат. Тиде жапыште вӱд пуч-влакым ачалыме-тергыме паша каяш тӱҥалеш.