"Тоштер йӱд" акций

Тиде шуматкечын, 21-ше майыште, Йошкар-Олаште «Тоштер йӱд» акций эрташ тӱҥалеш. Поро йӱла почеш тоштер-влак тиде кечын йӱд марте пашам ыштат да шуко оҥай мероприятийым темлат. Мутлан, Евсеев лӱмеш тоштерыште программе 13 гыч 22 шагат марте шуйна. Тушто 5 площадка пашам ышташ тӱҥалеш. Национальный художественный галерейыште уна-влакым 17 гыч 23 шагат марте вашлийыт. Тушто акцийлан келыштарыме экспозиций, экскурсий ден модыш-влак лийыт. Изирак ийготан-влакым «Ну, погода» мультфильм гыч герой-влак вашлийыт да тӱрлӧ модыш дене модыктат.  Республикысе сӱретсымыктыш тоштер тиде кечын 15 гыч 23 шагат марте пашам ышта. Тушто мастар-классым эртарат, шкешотан спектакльым модын ончыктат, сӱретче да фотосӱретче-влак дене вашлиймашым эртарат. Моло тоштерат «Тоштер йӱд» акцийлан ямдылалтыт.