Таче- стратегический назначениян Ракет войскан кечыже

            Идалык еда 17-ше декабрьыште Россий Федерацийын Вооружённый Вийыштыже шарнымашан кече- стратегический назначениян Ракет войскан кечыже палемдалтеш. Тудым Россий Президентын Указше дене 2006-шо ий 31-ше майыште пеҥгыдемдыме. РВСН вооружённый вий семын 1959 ий 17-ше декабрьыште ышталтын. РВСН-ын кечыже икымше гана профессионал пайрем семын 1995-ше ийыште пеҥгыдемдалтын. Марий Элым вуйлатыше Александр Евстифеев кумшо степень Кутузов орденан 14-ше Киевско-Житомирский ракет дививзийын военнослужащийже да ветеранже- влакым стратегический назначениян Ракет войскан кечыже дене саламла. Эн ончычак тудо палемден: РВСН Россий Вооружённый вийын кугешнымашыже. Калыкле лӱдыкшыдымылыкын, элнан шкенжым арален кертмыжын негызше улеш. 14-ше ракет дивизий неле жапыште ышталтын. Кӱчык жапыште военнослужащий- влак у ракет технике дене пайдаланаш тунемыныт. Наукын да сарзе шонымашын кугун ончыко кайымыже РВСН-ым личный состав деч кугу профессионализмым йодшо  кызытсе жаплан келшыше кӱкшытыш луктын. Республикым вуйлатыше ешарен: Йошкар-Оласе ракет дивизийыште боевой дежурствышто присягылан да сарзе порыслан ӱшанле улшо еҥ- влак улыт. Александр Евстифеев военнослужащий да ветеран- влаклан пеҥгыде тазалыкым, сай илышым, профессионал сеҥымаш- влакым да тыныслыкым тыланен.