Шошо вӱдшор тений республикыштына 55 сурт верланыме кумдыкыш шарлен кертеш

               Шошо вӱдшор тений республикыштына 55 сурт верланыме кумдыкыш шарлен кертеш. МЧС-ын республикысе тӱҥ виктемыштыже кугу вӱд дене кылдалтше йодышым каҥашыме. Граждан оборона да калыкым аралыме виктемым вуйлатыше Сергей Скоробогатовын мутшо почеш шошо вӱдшорын могай лийшашыже мартысе да апрельысе игече деч шогаш тӱҥалеш. Ончылгоч шымлыме почеш, тудо осал лийшаш огыл. Эҥерлаште вӱд нормо дене келшышын нӧлталалтшаш. Но лапка верлаште шинчыше пӧрт ден корнылам лум вашке шулымо дене вӱд налын кертеш. Вӱд шарлыме верыш ныл районысо вич илем логал кертеш. Тиде Йошкар-Ола, Курык марий, Звенигово да Медведево районлаште. Йошкар-Олаште вич пӧрт, Куярыште-32, Кокшайскыште-6, Три Рутки посёлкышто-3, Нолько посёлкышто-9 пӧрт ночко верыш логалыт. Сӱрет начарешт кая гын, калыкым жаплан вераҥдаш 9 пунктым ямдылат. Сергей Владимировичын мутшо почеш кугу вӱдшор 2016-шо ийыште лийын. Вӱд шарлыме верыште сибиреязвенный вольык тойымо кум вер уло: Килемар кундемыште Сенюшкин ден Отар, Медведево районышто- Лебедевский. Чылаштыжат бетон гыч саркофагым ыштыме. Нуно пӱртӱслан да калыклан лӱдыкшым огыт лук.
                Фото: МариМедиа.