«Шернур сырзавод» косметикымат луктеш
Кодшо кечылаште республикын промышленность, экономически вияҥмаш да торговля министрже Стансилав Крылов «Шернур сырзавод» акционер ушемын директоржо Сергей Черных ден косметик корно дене вуйлатышыже Арина Кожанова дене вашлийын. Тиде завод республикын ик эн ончыл предприятийжылан шотлалтеш. Тудын продукцийже республикыште гына огыл, туддеч ӧрдыжтат сайын палыме. Вашлиймашыште предприятийым ончыкыжым вияҥдыме, у технологий оборудованийым налме, лукмо продукцийын ассортиментшым кумдаҥдыме нерген ойлымо. Завод кажне ийын у сату- влакым ешарен толеш. Ик эн пытартыш разработкылан каза ӱй да каза тувыртыш вӱд негызеш ӱплан средстве шотлалтеш. Чыла продукций сай качестван, экологически ару сырьё гыч ышталтеш.