Заводын чапле лӱмгечыже
Таче Йошкар-Оласе Полупроводник прибор- влак завод шкенжын 80 ияш лӱмгечыжым палемда. Сар тӱҥалме ийлаште почмо предприятий Кугу сенымаш кечым лишемдаш полшен. Тудо фронтлан кӱлешан продукцийым луктын. Таклан огыл заводышто тыршыше- влакын пашашт Кугу Ачамланде сарын икымше степенян орденже дене палемдалтын. Элыштына лийше вашталтыш- влак коллективлан неле тергымаш лийыныт. Но завод илен лектын да утыр вияҥ толын, у технологий- влакым шыҥдарен, у продукций- влакым лукташ тӱҥалын. Тудын лукмо металлокерамике изделий, полупроводник прибор- влак, калык кучылтмо сату, спецтехнологий оборудований республике деч ӧрдыжтат шкенжын кӱкшӧ качествыже дене сайын палыме улыт.