Марий Элым вуйлатыше еҥ-влакым чын умылаш да ковид ваштареш виктаралтше лӱдыкшыдымылык мерым эскераш ӱжын

                    Марий Элым вуйлатыше еҥ-влакым чын умылаш да ковид ваштареш виктаралтше лӱдыкшыдымылык мерым эскераш ӱжын, уке гын локдауным пурташ верештеш, манын. Александр Евстифеев Российын Вице-премьерже Татьяна Голикован элысе 13 кундемыште да Марий Элыштат эпидемиологий сӱрет начаремме нерген увертарымекыже, писын гына Опертивынй штабын заседанийжым эртарен. Каҥашыме годым палемдыме: коронавирусын шарлымыже тургыжланымашым луктеш, Черланыше- влак ешаралтыныт, чер нелынрак эрта. Ик амалже- лӱдыкшыдымылык мерым шуктыдымаш. Кевытлаште, тӱшка транспортышто да моло вереат маскым огыт чий, дистанцийым огыт эскере. Тидыже инфекцийлан шарлаш йӧным пуа. Тидлан кӧра республикым вуйлатыше пӱтынь калыкым шоналтен, чын умылаш да лӱдыкшыдымылык мерым эскераш ӱжын ойлен. Ужалкалыме рӱдерлам вуйлатыше- влак тыгай мерым шуктымым эскерышаш улыт. Александр Евстифеев палемден: лишыл кечылаште Ковид мерым пеҥгыдемдыме лиеш. Тудым шуктыдымо годым закон дене келшышын административно мутым кучаш шогалтат. Санитар- эпидемиологий ситуаций эшеат начарештеш да вакцинаций темп иземеш гын, локдауным пурташ верештеш, манын тудо. Бизнеслан полшаш манын, ик кевытымат петырыме огыл, куар код системе пашам ышта. Ужалкалыме рӱдер, кевыт, полышым пуышо тӧнеж- влак тиде йодмашым огыт шукто гын, правительстве чыла чарымашке да петырымашке кусарен кертеш. Республикым вуйлатыше тыгак вакцинацийым чолганрак эрташ кӱштен. Кызыт 239 тӱжем еҥ прививкым ыштыктен. Тидыже тӱшка иммунитетлан эше ок сите.