Марий Элым вуйлатыше Вакцинаций рӱдерын пашажым умбакыже шуяш да экспресс тестированийлан 17 миллион теҥгем ойырен
Марий Элым вуйлатыше Вакцинаций рӱдерын пашажым умбакыже шуяш да экспресс тестированийлан 17 миллион теҥгем ойырен. Республикым вуйлатыше Александр Евстифеевын кӱштымыж почеш Сеҥымашын кумлымшо идалыкше лӱмеш тӱвыра полатыште Вакцинаций рӱдерлан умбакыже пашам ышташ ныл миллион теҥгем, СПИД рӱдерлан коронавирус шотышто тестирований дене шукырак еҥым авалташ пробым ойырышо автомат станцийым налаш 8 миллион теҥгем да ковидлан экспресс диагностикым ышташ тестым налаш 5 миллион теҥгем пуаш ыштыме. Правительствын тыгай распоряженийжым коронавирус ваштареш кучедалме йодыш дене эртарыме совещанийыште пеҥгыдемдыме. Тазалыкаралтыш министр Марина Панькова коронавирус шарлыме шотышто сӱрет республикыште тургыжландарыше манын. Сандене вакцинаций пашам эше вияҥден колтыман. Тидлан кӧра вакцинаций рӱдерын пашажым эше кок тылзылан шуйымо. Правительство председательын алмаштышыже Ольга Фёдорован мутшо почеш, вакцинаций кугыт палынак ешаралтын. Кызыт утларак калык прививкым ыштыктынеже. Мутлан, ик кечын 26-шо октябрьыште гына 6 тӱжем еҥ ыштыктен. Кызыт визыт - визытат пеле тӱжемыш шуэш. Совещанийым иктешлышыла, Александр Евстифеев палемден: ыштыме пашан лектышыжым да вакцинацийын кузе кайымжым иктешлымаш пашадыме кече- влак эртымеке ышталтыт. Тидымат каласыме: медицина организаций да вакцинаций рӱдер- влак икымше гыч 7-ше ноябрь марте тичмаш пашам ыштат.