Марий Элыш шым автоклубым кондымо
Марий Элыш шым автоклубым кондымо. Тенийлан палемдыме чыла автоклуб республикыш толын шуын. Тиде пашам «Тӱвыра» калыкле проектым шыҥдарыме кышкарыште ыштыме. Тидлан 34 миллион теҥгем кучылтмо. Куснылшо клуб- влакым Волжский, Килемар, Куженер, Медведево, Оршанке, Параньга да Советский районлаш пуымо. Тиде авторанспорт дене 166 тӱжем еҥым тӱвыра паша дене авалташ лиеш. Автомобиль- влак клуб уке верлаште тӱрлӧ мероприятийым эртараш сцене семын кучылталт кертыт. Шушаш 2022-шо ийлан эше куд автоклубым кондышаш улыт. «Тӱвыра» калыкле проект почеш 2024-ше ийлан тыгай тӱвыра рӱдер- влак чыла муниципал районлаштат лийшаш улыт.