Параньгаште йӱшаш вӱдым чылалан ситарат

                Параньгаште артезиан скважиным да вӱд башньым ышташ тӱҥалыныт. Районысо рӱдӧ посёлкын йӱдвел ужашыштыже Тукай ден Кооператив уремла коклаште «Бурводстрой» организацийын пашаеҥже- влак артезиан скважиным кӱнчаш тӱҥалыныт. Тидын нерген район администрацийыште увертарыме. Кодшо арнян пашан кузе кайымыжым чоҥымаш, архитектура да илыме вер ден коммунал озанлык министр Михаил Степанов терген. Район администрацийым вуйлатыше Альфит Ибраевын мутшо почеш, ик скважиным да 50 кубометрлан вӱд башньым чоҥаш палемдыме. Полиэтилен пуч гыч 700 метр кужыт вӱдпуч сетьым чоҥат. Тыге у водозаборым Тукай де Кооперативный уремласе улшо сеть дене ушат. Тӱн водозабор кундемыште эше ик скважиным ышташ шонымаш уло. Тудыжо тоштыжым вашталтышаш. Ушештарена: посёлкысо 480 еҥ илыман икмыняр уремыште вӱд ситыдымаш палдырнен ыле. Сандене Александр Евстифеевын Указше почеш йӱшаш вӱдым ситараш манын, Параньгалан шым миллионат 500 тӱжем теҥге оксам ойырымо ыле.
                  Фото: "Марийская правда".