Республикыштына вич медицина тӧнежым олмыктымо да ФАП-ым чоҥымо
Республикыштына вич медицина тӧнежым олмыктымо да ФАП-ым чоҥымо. «Республикыштына тазалыкаралтышын икымше звеножым уэмдыме» регионысо программым шыҥдарыме лектыш почеш медицина полышын качествыже саемме нерген ойлаш лиеш. У тӧнеж- влак чоҥалтыт, улшыжо у оборудований ден транспортым налеш, паша темп ешаралт шога. Тазалыкаралтыш министрын алмаштышыже Ангелина Ушакован мутшо почеш, первичный звеном уэмдыме программым шыҥдараш республикыште 2025-ше ий марте кок миллионат 60 тӱжем теҥгем колташ палемдыме. Миллионат 900 утла тӱжем теҥгеже федерал бюджет гыч. Тиде программе почеш кодшо ийын Учимсолаште ФАП- ым чоҥымо, у оборудований да мебель дене пойдарыме. Капитально олмыктымо шотышто ойлаш гын, кодшо ийын 6 объектыште пашам шукташ палемдыме ыле: Волжский. Морко, Шернур поликлиникылаште, Азаново да Виловат участковый эмлыме верлаште да Солнечный врач амбулаторийыште. Тиде пашалан 93 миллион теҥгем ойырымо ыле. Лач Шернур поликлиникым жапыштыже ыштен шуктен огыл, пашам тений гына мучашлыме. Оборудованийым налаш 223 миллион теҥгем ойырымо ыле. 33 единице оборудованийым налме. Нунын коклаште компьютер томограф, 4 маммограф, 5 флюорограф, 3 стационар рентген аппарат улыт. Оперативный пашалан 61 автомобильым налме. Тиде пашалан 49 миллион теҥгем кучылтмо.