Кугу кевыт- влаклан акым иземдаш темлыме

                 Кодшо ий мучашыште Российысе федерал антимонопольный служба ужалкалыше кугу сеть- влак дене икмыняр совещанийым эртарен. Ритейлер- влаклан социал кӱлешан кочкыш сатулан шке кумылын акым иземдаш полшышо акым палемдыме механизмым ямдылаш темлыме. Совещаний- влакын лектышышт почеш кум ритейлер Службыш акым иземдыме шотышто шке темлымашыжым колтен. Мутлан, «Магнит» ден «Дикси» кевытлам ушен шогышо «Тандер» ушем ден «Пятёрочка», «Перекрёсток», «Карусель» да «Чижик» кевытлан  «Икс 5 Ритейл групп» ушемышт эн кугу наценкым 10 процент марте, а «Бристоль» сеть 10-15 процент марте шагалемдаш ямде улыт. Тыгай наценка тений идалык мучко аралалт кодшаш да кугемшаш огыл. Социал кӱлешан кочкыш сату радамыш кинде, ложаш, кушкыл ӱй, сакыр, шинчал, шӧр, рис, шемшыдан, манка да тар шӱраш- влак, чыве муно, макарон, икмыняр саска ден фрукт пурат. «Ритейл групп» тӱшкаш пурышо чыла кевытыште 12-шо январь гыч 20 утла категорий сатулан акым кугемдаш  чарымашым пуртымо, «Магнит» кевытлаште 25 категорий гыч 200 наре сатулан акым огыт кӱзыктӧ. Тыгак идалык мучаш марте «Бристоль» кевытыште 10-15 процент наценка аралалт кодеш.