15 кугу медицина оборудованийым налаш палемдыме
Республикыштына 15 кугу медицина оборудованийым налаш палемдыме. Тенийлан первичный звеном модернизироватлыме программе почеш 374 миллион теҥгем ойыраш лийме. Тушечын 362 миллион утлаже- федерал казна гыч. Программым ныл корно дене шыҥдараш пунчалме: чоҥымаш, капитально олмыктымаш, медицина оборудованийым да транспортым ситарымаш. Тений 47 миллион нере теҥгелан Краснооктябрьскысе врач амбулаторийым чоҥаш шонат. Тыгак вич объектым капитально олмыкташ палемдыме. Тиде- Йошкар-Оласе 2-шо, 4-ше поликлинике, икымше йоча поликлинике, Волжск оласе 2-шо поликлинике да Семёновкысо врач амбулаторий. Тиде пашалан 80 миллион теҥге кайышаш. Тений тыгак медицина организаций-влаклан 15 неле оборудованийым налаш планыш пуртымо: 226 миллион теҥгелан 10 маммографым, 2 флюорографым, 3 стационар рентген аппаратым. Тений тыгак 24 автомобильым налаш палемдыме.