Йошкар-Олаште эше кум аварийный пӧртым кораҥдаш палемдыме
Йошкар-Олаште эше кум аварийный пӧртым кораҥдаш палемдыме. Мэрийыште тыге шотлат: верысе самоуправлений органын ик эн кӱлешан пашажлан оласе кумдыкым комплексно вияҥдымаш шотлалтеш. Тидлан частный инвестицият кучылталтшаш. А тудыжо илыме вер фондым да микрорайонласе коммунал инфраструктурым уэмдаш сай полышым ыштышаш. Тиде паша кышкарыште Соловьёв, Пугачёв, Тургенев, Павлов уремла кокласе кварталым комплексно вияҥдаш ойпидышым пеҥгыдемдаш правам налме шотышто аукционым увертарыме. Тиде верын тӱшка кумдыкшо куд тӱжем утла квадрат метрыш погына. Ойпидыш кышкарыште аварийныйлан шотлалтше кум пӧртым: Соловьёв уремысе 19-ше да 21-ше, Тургенев уремысе 16-шо пӧртым кораҥдаш да тушто илыше калыкым кусараш палемдыме. Кораҥдыме пӧрт- влак олмышто шуко пачеран пӧртым чоҥаш, кундемжым тӱзландараш тӱҥалыт: корно, парковко, тротуар, велокорно, спорт, йоча модмо площадке- влак, контейнерым шындыме вер лийшаш. Аукционышко ушнаш йодмашым 9-ше февраль марте налыт.