Пашадымылык иземын толеш
Паша да калыклан пашавер шотышто Департамент республикыштына пашадымылыкын иземмыжым палемда. Тений идалык тӱҥалтыш гыч пашавер рӱдерлашке пашам кычалын 16 тӱжемат 600 еҥ миен. Тидыже ӱмашсе тыгаяк жап дене таҥастарымаште 37 утла процентлан шагалрак. Тенийсе 29-ше ноябрьлан шотлымаште пашадыме- влакын чотышт кум тӱжемат 624 еҥ лийын. Тидыже кодшо ийысе деч кок процентат пеле нарылан шагалрак. А республикысе данный банкыште шым тӱжемат 909 вакансийым палемдыме. Тидыже тенийсе ий тӱҥалтыш деч ик кумшо ужашлан шукырак. Тушечын ныл тӱжемат 400 пашаверже пашазе профессий дене кылдалтын. Тений идалык тӱҥалтыш гыч пашам пуышо вич тӱжем организаций занятость службыш 36 тӱжемат 792 яра вер улмо нерген увертарен. Нине верлашке занятость службо- влак идалык тӱналтыш гыч 31 тӱжем направленийым пуэныт. Тушечын 8 тӱжемат 400 еҥже келшыше пашалан тореш лийын, кок тӱжемат 600 утла еҥже направлений почеш пашаш пурен.
