Звениговышто канализаций коллекторым олмыкташ 11 миллион утла теҥге оксам ойырымо

              Марий Элым вуйлатыше Александр Евстифеев Звениговышто канализаций коллекторышто лийше аварий ситуацийым корандыме йодыш дене оперативный совещанийым эртарен. Оласе Гагарин уремыште канализаций коллекторын куртньӧ- бетон пучшын кӱшыл ужашыже пудыргымылан кӧра, черетан аварий лийын. Тыге шым тӱжем еҥ йӱштӧ вӱд деч посна кодын. Аварийым кораҥдаш экстренный мерым ыштыме. Кызыт кучылтмо канализаций вӱд жаплан ыштыме схеме дене колталтеш. Сметный расчётым ыштыме почеш рашемын: аварийым кораҥдаш 11 миллионат 360 тӱжем теҥге кӱлеш. Александр Евстифеев финанс министр Алексей Торошинлан тиде шийвундым республикысе Правительствын резерв фондшо гыч ойыраш да олмыктымо пашам тӱҥалаш кӱштен. Звенигово районлан тиде икымше окса полыш огыл. Пытартыш ныл ий жапыште коллекторышто аварийым кораҥдаш 78 миллион теҥгем ойырымо. 2017-ше ий гыч тӱҥалын районышто ЖКХ аланыште икмыняр социал кӱлешан проектым шыҥдарыме. Красногорский посёлкышто очистной сооруженийым пужен ыштыме, Звениговышто у насос станцийым чоҥымо. Кызыт Звенигово олаште очистной сооруженийым пужен ыштыме проект шыҥдаралтеш. Ончыкылык кум ийлан кум водозаборым чоҥаш палемдыме: Сергушкин ялыште, Мочалище посёлкышто да Красногорский посёлкышто. Нине пашалан чылаже 560 миллион теҥгем ойырымо.
               Фото: МариМедиа.