Марий Элыште У ий почто марке ужалымашке лектеш

               Марий Элыште У ий почто марке ужалымашке лектеш. Эрла почтын пайрем палыже российысе 15 олаште да Йошкар-Олаштат лектеш. Маркылан эскизым Санкт-Петербург гыч дизайнер Светлана Токаренко ыштен. Тудын лум пырчым ончыктышо пашаже Россий кӱкшытан конкурсышто сеҥышыш лектын. Икымше выпускын тӱшка тиражше 414 тӱжем экземпляр лийын, кокымшыжо куд тӱжемат 500 лаштык. Маркын акше- 24 теҥге. Марке деке ешарен Йошкар-Оласе рӱдӧ почто пӧлкаш 9-ше декабрьыште кучылтмо нерген специальный штемпель толеш. Кучылтмеке тудым эрелан аралаш Павлов лӱмеш связь тоштерыш колтат. Республикысе да оласе калык шкеныштын отправленийыштышт 9-ше декабрьым ончыктышо  штемпельын оттискшым Советский уремысе 140-шо пӧртыштӧ шындыктен кертыт. Специальный штемпель мо дене ойыртемалтеш? Тушто событийын але шарнымашан датын лӱмжӧ возалтын. Кажне кечын шындыме дате уке. Сандене ик кече гына пашам ышта. Вара штемпельым кораҥдат да ыштен лукшылан пӧртылтат. Сандене лукмо кечын шындыме марке уло тӱнясе коллекционер- влаклан ешартыш филателист акым налеш, - умылтара федерал почто кылын Марий Элысе виктемжым вуйлатыше Андрей Виногоров.
              Фото: МариМедиа.