Ныл тунемше Россий кӱкшытан сочинений конкурсышто финалыш лектын
Марий Эл гыч ныл тунемше Россий кӱкшытан сочинений конкурсышто финалыш лектын. Тенийсе конкурсын регионысо йыжыҥжын лектышыжым иктешлыме. Конкурсыш ушнышо- влаклан шым тематикым темлыме ыле. Сочиненийым серыш, очерк, ойлымаш але эссе семын возаш темлалтын. Регионысо йыжыҥыште 4 гыч 11-ше класс марте 13 тунемше моштымашыжым ончыктен. Сеҥышылан икымше номеран школын нылымше классше гыч Екатерина Яшина, У Торъял школын 6-шо классше гыч Александр Смирнов, Килемар школын 8-ше классше гыч Тамара Лебедева, Козьмодемьянскысе «Дарование» школын 10-шо классше гыч Надежда Маркова лектыныт. Нунын сочиненийыштым конкурсын федерал йыжыҥышкыже колтымо. Тудын лектышыжым 17-ше декабрьыште увертарат. Российысе йыжыҥыште 100 тунемше сеҥышыш лекшаш.