Олан мэрже чоҥымо да рончымо пашам терген

             Евгений Маслов Йошкар-Ола мучко паша дене коштшыжла Ураев бульварын кокымшо йыжыҥжым кузе чоҥымым да калыкым кусарыме тошто пӧртлам рончымо пашам аклен. Эн ончыч тудо Тыныслык ден Киров урем ушнымаште подряд органиазцийын еҥже дене мутланен. Лач тушечын  Ураев бульварын кокымшо йыжыҥжым чоҥымаш тӱҥалын. Республикым вуйлатыше да Марий Эл Правительствын командыжын моштен виктарымыштан кӧра, кодшо ийын Киров урем деч Петров урем марте бульварын ужашыжым пашаш колтымо ыле, а тений тудым Мир урем дене ушаш йӧн лектын. «Спецстрой» чоҥышо компанийым вуйлатыше Радик Закировын мутшо почеш, кызыт инженер сеть ышталтеш, йӱр вӱд йогымо канализаций да дренаж ситсемым чоҥат. Май мучашлан бетонироватлаш тӱҥалыт. Тунам кок-кум арнялан корным петыраш верештеш. Чоҥымо ужаш кугу огыл, тудо 162 метр кужытан веле, но куштылго огыл, мланде йымалсе вӱд кӱшнӧ верланен. Уремын геометрийжым вашталтыман, у тротуар, светофор, троллейбус сеть- влак лийыт.
               Евгений Маслов тыгак калыкым кусарыме тошто пӧртлам рончымо пашамат ончен. Кызыт 15 пӧртым кораҥдаш кантрактым пеҥгыдемдыме. Нуно Ширяйково микрорайонышто, Семёновка селаште, ола рӱдыштӧ да Нолька посёлкышто верланеныт. Подрядчик тымарте Заводской изуремысе 5, Голиков изуремысе 6-шо пӧртлам кораҥден, кызыт Соловьев уремысе 11-ше полртым рончаш ямдылалтеш. Чыла пӧртшымат сентябрь мучашлан кораҥден шуктыман. Евгений Маслов пӧртым кораҥдыме жапым рекордный семын аклен. У илыме верым пуымашат писын кая. 2025-ше ий марте кусараш палемдыме программым Александр Евстифеев ончылгоч 2023-шо ийыштак шукташ задачым шынден.
       Фото: Йошкар-Ола администраций.