Калыкын йӧратыме турист верлашке намийыше корно- влакым олмыкташ тӱҥалыт

             Марий Элыште калыкын йӧратыме турист верлашке намийыше корно- влакым олмыкташ тӱҥалыт. «Качестван лӱдыкшыдымӧ корно» калыкле проект кум ий  ыштыме жапыште кӧргӧ туризмым вияҥдымашке кугу надырым пыштен. Ятыр турист объектыш мияш куштылгырак да йӧнанрак лийын. Республикылаште ойыртемалтше верлашке намийыше 800 утла корным норматив марте шуктымо. Нунын тичмаш кужытышт ныл тӱжем утла километрыш погына, - увертарен Российын вице-премьерже Марат Хуснуллин. Тенийсе корно тургымышто тиде пашам умбакыже шуйымо лиеш. Калыкле проект почеш мероприятий- влак программыш республикысе вич трассе пурен. Тиде: Шернур-Казанское- Кукнур- 12 меҥге утла, Одобеляк-Куженер-Параньга- 11 меҥге утла, Йошкар-Ола- Уржум- 9 меҥге деч шукырак, Помар-Коркатово- 18 меҥге. Нунын нерген ойлымо ыле.
            Тений эше ешартыш оксам ойырен, Курык марий районышто Октябрьск- Троицкий Посад корнын вич меҥгат пеле ужашыже саемшаш. Автомобиль корно Сухин ялыш намия. Тушто хор коллектив, вокал ансамбль, солист да музыкант-влакын йӧратыме «Пеледыш айо» пайрем эртаралтеш. Идалык еда муро алан тӱрлӧ мотор вурегман коллектив- влак дене волгалтеш. Тений тыгак Козьмодеьянск –Кого Сундырь корнын 8 меҥге кужытшым олмыктат. Тиде корнымбалне Акпарслан чапкӱ верланен. Тыге кӧргӧ туризм экономикым вияҥдымаште кӱлешан инструмент лийын кертеш.