Тӱвыра поянлык объектлан шотлалтше пӧртым олмыкташ палемдыме

          Рӱдӧ олаште тӱвыра поянлык объектлан шотлалтше пӧртым олмыкташ палемдыме. Шанче да проект документацийым ямдылаш конкурсым увертарыме. Тиде купеч Булыгинын пӧртшӧ нерген ойлалтеш. Тудо Советский уремыште 102-шо номер дене верланен. Пашам декабрь кыдал марте ыштен шуктыман. Заказчикше- Йошкар-Олан историй тоштерже, окса оласе бюджет гыч ойыралтшаш. Тичмаш налмаште объектым пайдаланаш лийшылан шотлымо. Но негызшын гидроизоляцийже локтылалтын, южо тӱжвал кермычше шалана, кудывече велым штукатуркыжо комыжлалтеш, икымше ден кокымшо пачаш коклаште балкыже изиш кадырген.
           А кокымшо пачашын леведышыже, карнизше, фронтонжо аварийныйлан шотлалтеш. Тиде пӧртым Михаил Таланцев 1835-ше ийыште чоҥен. А 1888-ше ийыште купеч- влак Булыгинмытлан ужалыме. Нунын «Булыгин ден эргыже» ужалкалыме пӧртышт улмаш. Кокымшо пачашым илаш арендыш пуэныт. А икымше пачашыште сырам темкален ужалыме вер лийын. 1918-ше ийыште тушан военно-революционный советым вераҥдыме. Вара военкоматат, исполкомат, ГПУ-ат верланеныт, вара тудо НКВД радамыш пурен. Туддеч вара тушто МВД-н типографийже пашам ыштен.
              Фото: Ваш Новый День» газет.