Сенатор Сергей Мартынов профобразований системым вияндымашын кӱлешлыкшым палемден

            Сенатор Сергей Мартынов профобразований системым вияндымашын кӱлешлыкшым палемден. Тудо республикыш уэш толмыжо годым Параньга районыш миен да районысо ик вӱдышӧ туныктымо рӱдерыште- строительно- технологий техникумышто лийын. Тудын коллективше дене вашлиймаште район администрацийым вуйлатыше Альфит Ибраев ден Кугыжаныш Погынын депутатше Владимир Кожанов лийыныт.                                      Техникумышто электромонтёрлан да каменщиклан, повар ден кондитерлан, водитель ден трактористлан, сварщик ден слесарьлан туныктат. Сенатор палемден: тыгай профессий- влак кызытсе саманыште моткоч кӱлешан улыт. Кызыт тушто 200 наре еҥ тунемеш, 51 туныктышо пашам ышта. Икмыняр ий почела тунемше- влак «Самырык профессионал- влак» чемпионатыште участвоватлат да призан вер- влакым налыт. Кодшо ийын тыште тунемше рвезе коҥгам оптымо паша дене шӧртньӧ медальым налын, а Российыште профессионал мастарлыклан медальоным.                                     Техникумышто кугыеҥ-влакат шинчымашым налыт. Кызыт 20 еҥ трактористлан тунемеш. 90-шо ийлаште профессионал туныктыш системе изиш гына петыралтын огыл. Сандене заводлаште сварщик, станок оператор, пасулаште механизатор огыт сите. Но Российысе кундемлаште Параньгасе семын тыгай коллектив- влакым арален коден кертыныт. А тиде верысе калыклан пашавер, экономикылан-профессионал- влак.                               Районыш мийыме деч вара Сергей Мартынов республикын туныктыш министрже Лариса Ревуцкая дене вашлийын. Нуно Параньга техникумлан леведышым олмыктымо шотышто полышым пуымо нергенат ойленыт. Тыгай йодышым техникумын директоржо пуэн. Ведомствыште полышым пуаш сӧреныт.
           Фото: Сергей Смирнов.