Нылымше номеран поликлиникын зданийже уэмеш
Подрядчик Йошкар-Оласе нылымше номеран поликлиникын зданийжым капитально олмыкташ тӱҥалын. Тиде паша «Тазалыкаралтыш» калыкле проектын «Марий Элыште тазалыкаралтышын первичный звеножым уэмдымаш» регионысо программе кышкарыште шукталтеш. Поликлиникыш оласе 56 тӱжем утла еҥ коштеш. Тудым Прохоров уремыште 1976-шо ийыште чоҥымо. Тымарте ик ганат капитально олмыкталтын огыл. Ончылно кугу паша вуча. Леведышым, теплоузелым, тӱжвал пырдыжым, пурымо верым олмыктыман, окна- влакым вашталтыман. Пашалан 25 миллион утла теҥге окса кайышаш. Тудо республикын бюджетше гыч ойыралтеш. Пашам июль мучашлан пытарышаш улыт.