Российысе чоҥымаш министерствыште Марий Элыште «Яндар вӱд» да «Юл эҥерым тазаҥдымаш» федерал проект- влакым шыҥдарыме йодышым каҥашеныт
Российысе чоҥымаш министерствыште Марий Элыште «Яндар вӱд» да «Юл эҥерым тазаҥдымаш» федерал проект- влакым шыҥдарыме йодышым каҥашеныт. Российын чоҥымаш министржын алмаштышыже Алексей Ересько Марий Эл правительстве вуйлатышын икымше алмаштышыже Александр Сальников дене вашлийын. Нине проект-влак республикыште чолган шыҥдаралтыт манын палемдыме. 2019-ше ийыште «Республикысе вӱдым ситарыме пашам саемдымаш» регионысо программым пеҥгыдемдыме да тудым 2024-ше ий марте палемдыме. Тудо поснак нормылан келшен толдымо вӱдан кундемлаште шыҥдаралтеш. Кызыт республикыште 90 процент калык чапле вӱд дене пайдалана. 2024-ше ий марте 100 процент калык сай вӱдым йӱшаш.
«Юл эҥерым тазаҥдымаш» проект кышкарыште Йошкар-Олаште, Параньгаште, Килемарыште очистной сооружений- влак пужен ышталтшаш улыт, а Косолопышто уым чоҥаш палемдыме. Тыге 2024-ше ий марте Юл эҥерыш лавыра вӱд 40 кубометр огыл, а 15 кубометр марте шагалрак логалшаш. Александр Сальников палемден: Российын Президентшын кӱштымыжым жапыштыже да сайын шукташ ешартыш оксам кушеч налме йодышымат каҥашыме.
Фото: Марий Элым вуйлатышын организаций да аналитик виктемже.