Мэр вандализм йодышым каҥашымашке ушнен

                     Йошкар-Олан мэрже Евгений Маслов ола администрацийыште эртыше йыргешке ӱстел йыр мутланымаште лийын. Тушто олам тӱзландарыме правилым пудыртымылан ответственность  да вандализм йодышлам каҥашыме. Ола озанлык виктемым вуйлатыше Алексей Поповын мутшо почеш, проект дене тӱзландарыме оласе кумдык- влак чӱчкыдын пудырталтыт. Пытартыш ийыште гына оласе погым пудыртымо 15 фактым рашемдыме. Эҥгекше 900 тӱжем наре теҥгеш шуын. Мэр ешарен: южо титакан еҥжым рашемдыме да мут кучаш шогалтыме. Калык палышаш: кажне тыгай случай кӱлеш тергымашым эрта да титакан- влак пеҥыде наказанийым налыт. Тиде сомылыш ме правам аралыше органым ушнаш йодына. Тиддеч посна, кызыт шокшо шогымо годым лӱдыкшыдымылык правилым эскерыде ятыр еҥ келыштарыдыме верлаште йӱштылеш, шкенжын илышыже да тазалыкшылан эҥгекым конда. Тиде административный правонарушенийлан шотлалтеш, тудлан штрафым тӱлыктат. Администрацийыште советник Андрей Таников ешарен: кызыт видеоэскерыме оласе системе ышталтеш. Икымше сентябрьлан кӱлешан, тӱшка верлаште да уремлаште 100 камерым вераҥдаш палемдыме. Тидыже правонарушенийлам рашемдаш полшышаш. Йыргешке 
ӱстелын лектышыже почеш, тунемме мероприятийлам эртараш, рейд- влакын графикыштым ышташ палемдыме.