Чодыраште тул пижме лӱдыкшӧ кугемын
Республикысе чодыраште нылымше классан тул пижын кертме лӱдыкшым палемдыме. Пеш чот шокшо толмо да йӱр йӱрдымылан кӧра, Марий Эл Правительстве 19-ше июнь гыч 5-ше июль марте республике кундемыште тул ваштареш шогымо посна режимым пуртен да чодырашке еҥ- влалкан да транспортлан пураш чарен. 24-ше июньлан шотлымаште тул пижме лӱдыкшӧ тургым тӱҥалме годсек чодыраште 21 гана тул пижын. Тичмаш налмаште тудо 75 наре гектар кожлам авалтен. Тудын кондымо эҥгекше 603 тӱжем теҥгеш аклалтеш. Тӱҥ амалжылан айдемын титакшым шотлат. 21 гыч кум ганаже веле волгенчылан кӧра ылыжын. Пӱртӱс поянлык министерстве увертара: 25-ше июнь гыч чодыраште пожар шотышто кугу, нылымше классан лӱдыкшӧ улмым пеҥгыдемдыме.