Марий Элысе туныктымо аланыште ямдылыме цифран решений- влакым Российыште ик эн сайлан шотлымо

             Марий Элысе туныктымо аланыште ямдылыме цифран решений- влакым Российыште ик эн сайлан шотлымо. Республике гыч Ай-Ти специалистын «Школын ушан расписанийже» проектше туныктымо аланыште ик эн сай цифран решенийлан шотлалтын. Сервисым кодшо ийын сентябрьыште Краснооктябрьский кыдалаш школышто пашаш колтымо. Тудо школ расписанийым виктарыме автоматизированный системе улеш. Холлышто верланыше мониторышто, Телеграмм, Вайбер, ВКонтакте чат-ботышто данный- влак ик жапыштак вашталт шогат. Тыгак «Школысо полышкалыше Варя» йӱк полыш пашам ышта. Проект урок, йыҥгыр расписанийым пален налаш, кажне класслан увертарымашым, тунемме книган спискыштым, школ нерген тӱшка уверым пален налаш полша. Ямдылыше- влак сервисым шыҥдарыме пашам шулдештараш йӧным муыныт. Адакшым тыгай разработко элыштына уке. Кызыт ушан расписанийым моло школлаштат кучылташ ямдылалтыт. У тунемме ий тӱҥалтышлан Йошкар-Олаште кок школ да Медведево районышто кок школ тудым илышыш шыҥдара. Проектым Российысе стратегий инициативе Агентствыште кӱкшын акленыт да Смартека платформышто эн сай практике каталогышто савыктеныт. Платформышто тыгак Марий Элыште пашам ыштыше 9 проектым ончыктымо. Кумытшо моло кундемыштат сайын кучылталтеш. Мутлан, меланомылан профилактикым ыштыме сервисым 20 субъектыште почмо.