Армий деч шылын коштмылан суд ончыко шогалтат

                Республике гыч эше ик рвезе армий деч шылын коштмылан суд ончыко шогалеш. Следствий виктемын Йошкар-Оласе следствий пӧлкаже 22  ияш рвезе шотышто уголовный пашам шымлен пытарен. Рвезе 2021-ше ийыште оласе сарзе комиссариатыш мияш ик гана веле огыл повесткым налын, но ик ганат миен огыл. Уголовный пашам тарватымеке тудын кушто улмыжым рашемдыме огыл. Тыге 7-ше февральыште кычалмашке увертаралтын. 28-ше мартыште Звенигово районышто ДПС пашаеҥ-влак корно правилым пудртышо автомобильым чареныт. Тушто рашемын: водитель кычалмаште улеш. Следовательын йодмыжо почеш тудым, петырыме. Тыге Армий деч шылын коштшо кокымшо рвезым оролымашке налме. Лишыл жапыште титаклыме ен суд ончыко шогалеш.