Республике гыч ийше- влак ойыртемалтыныт
Республике гыч ийше- влак Российын Чемпионат ден Первенствыштыже пьедесталын кӱшыл тошкалтышышкыже кӱзеныт. Йошкар-Оласе вӱд спорт полатыште уш-акыл шотышто начаррак тазалыкан- влак коклаште иймаш дене Российын Чемпионат ден Первенствыже да Россий кӱкшытан таҥасымаш- влак эртеныт. Российын 26 регионжо гыч 170 спортсмен моштымашыжым ончыктен. Нуно ныл кече жапыште 27 дисциплине дене таҥасеныт. Южыштыжо мемнан спортсмен- влак сай лектышым ончыктеныт. Клим Румянцев 400 метрыш иймаште Российын Чемпионатыштыже кокымшо лийын. Тыгай кужытыштак Российын Первенствыштыже Наталья Семёнова той медальым налын. Правительстве председательын икымше алмаштышыже Михаил Васютинын мутшо почеш тыгай таҥасымаш- влак республикыште адаптивный спортым вияҥдымаште кугу рольым налыт. Молан манаш гын, начаррак тазалыкан- влакым спорт дене кылым кучаш утларак ушаш йӧным ышта.
Спорт-туризм министерствын фотожо.