Константин Косачёв Марий Элыш паша визвит дене толын каен
Константин Косачёв Марий Элыш паша визит дене толын каен. Тиде жапыште тудо республикысе икмыняр мероприятийыште лийын, калыклан приёмым эртарен. Федераций Советым вуйлатышын алмаштышыже, республикысе кугыжаныш кучемын исполнительный органже деч представитель Константин Косачёв Марий Элым вуйлатыше Александр Евстифеев дене вашлийын. Нуно санкцийым пуртымо жапыште республикысе экономикым вияҥдыме да тидын дене кылдалтше йодыш- влакым писын виктарен колтымо йодышлам каҥашеныт. Марий Кугыжаныш университетыште Константин Косачёв студент- влак ончылно «Россий кызытсе тӱняште: у йодмаш да йӧн- влак» теме дене лекцийым лудын. Республикыш толмо жапыште сенатор тыгак Калык кидпаша мастарлык тоштерыш миен. Тушто тудо «Тӱням почшыла» экспозицийым ончен. Тудым инвалид- влакын «Отражение мира» мер ушемышт дене пырля ямдылыме. Тиддеч посна тудо «Йӱлам арален кодышыла» марий тӱр выставкым ончен. А Эрик Сапаев лӱмеш опера да балет кугыжаныш академический театрыште балет артист да хореограф- влакын Россий кӱкшытан конкурсыштым да руш кугу балерина Галина Уланова лӱмеш 20-шо фестивальым почмаште лийын. Парламентарий тыгак Дмитрий Медведевын регионысо мер приёмныйыштыжо калыклан приёмым эртарен. Мийыше- влакын йодышышт социал да экономик илыш дене кылдалтше лийыныт. Нуным контрольыш налме.