Российысе марий- влакын калыкле тӱвыра автономийышт федерал субсидийым налеш

             Российысе марий- влакын калыкле тӱвыра автономийышт проект- влакым шыҥдараш  федерал субсидийым налеш. Тудо калык- влакын пашашт шотышто федерал агентствын конкурсыштыжо сеҥышыш лектын. Федерал окса дене марий йылме дене ыштыме аудиозапись- влакым текстыш кусарыме программым умбакыже ямдылат, марий йоча муро- влак сборникым луктыт. Тиддеч посна кеҥежым Алтай крайыште Марий Тӱвыра кечым да Москошто «Пеледыш пайрем» калыкле пайремым эртараш палемдыме. Федерал агентстве деч полышым тений кугыжаныш политикым шыҥдарымаште тыршыше чылаже 27 организаций налеш, - увертара «Кидшер» сайт.
           Фото: «Кидшер» сайт.