Сергей Мартынов Марий Элыш паша дене толмо радамыште Параньга районыш миен

             Россий федерацийын сенаторжо, Федераций советыште Марий Элын представительже Сергей Мартынов Марий Элыш паша дене толмо радамыште Параньга районыш миен. Тушто тудо Элнет ялыште Шнуй-Тройчын храмым пужен ыштыме пашам терген. Тиде черкым эше 1887-ше ийыштак чоҥымо. Но 1934-ше ийыште тудым петырыме улмаш, да тушан пырчым аралыме клатым да вакшым ыштыме. Тыге эркын шаланен толын. Садлан юмылан ӱшаныше- влак шке кид дене олмыкташ тӱналыныт. Пайрем еда тушто юмылтымаш эрта. Но шке вий дене гына тӱрыс олмыкташ ок лий. Тыге верысе калык Сергей Мартынов деке йодмаш дене лектын. Тудо писын пашашке ушнен. Тудлан кӧра олмыктымо пашам федерал программыш пуртымо, тыгак тӱвыра поянлык объект- влакын единый кугыжаныш реестрышкышт логалын. Тыге 2020-шо ийыште федерал бюджет гыч шым миллион утлам, кодшо ийын эше 23 миллион теҥгем ойырымо. Кызыт тушто паша шолеш.
           Фото: Сергей Смирнов. «МедиаПоток».