Йошкар-Олан рӱдыштыжӧ тошто пӧрт- влак олмеш у илыме пӧрт- влакым чоҥат
Йошкар-Олан рӱдыштыжӧ тошто пӧрт- влак олмеш у илыме пӧрт- влакым чоҥат. Кумдыкым комплексно вияҥдыме механизм посна инвестицийым кучылтын, тошто пӧртла гыч калыкым кусараш полша. 2021-ше ий марте чоҥымо кумдыклам вияҥдыме программе пашам ыштен. Муниципалитет ден чоҥышо коклаште ойпидыш ышталтын. Тудын негызеш чоҥышо тошто пӧртла гыч калыкым кусараш обязательствым налын. Тыге ныл ойпидышым кылдыме ыле. Тудын дене келшышын Тӱн кӱвар воктене, Дубки, Вашский да Чеховский микрорайонлам вияҥдаш палемдыме. Кызыт чоҥышо «Вашский» микрорайоным уэмдаш тӱналын. Зарубин уремысе 10-шо пӧртым кораҥдыме, апрельыште 12-шо пӧртым кораҥдышаш улыт. Кок ий гыч тушто шуко пачеран илыме пӧрт- влак, йоча площадке нӧлталтшаш, ужар газон да асфальтан корно- влак лийшаш улыт. 2021-ше ий гыч кундемым комплексно вияҥдыме механизм шыҥдаралтеш. Тудо программышке аварийный гына огыл, тошто пӧрт- влакымат пурташ полша. Кундемлам комплексно вияҥдыме у технологий почеш кум ойпидышым кылдыме: 77-ше квартал, «Театральный» микрорайон, Соловьёв урем. Мэрийыште увертарыме почеш, ончыкылыкан кумдык-влак ятыр улыт. Нунын коклаште Суворов уремыште ММЗ ваштареш, «Дружба» стадион воктене, кызыт «Ширяйково» микрорайон шотышто мутланымаш кая.