У троллейбус- влак ешаралтыт

            Марий Элын правительствыже Йошкар-Оласе троллейбус паркым умбакыже уэмда. Тиде темылан Республикым вуйлатыше Александр Евстифеевын эртарыме совещаний пӧлеклалтын. Глава ушештарен: кодшо ийын Россий правительствын председательже Михаил Мишустин пунчалым пеҥгыдемден ыле. Тудын дене келшышын 2027-ше ий марте Российын финанс министерствыже элна мучко электрический транспортым уэмдаш оксам ойыраш палемдышаш ыле. Тичмаш акше 100 миллиард теҥге. Элысе кугу банк- влак трамвай ден троллейбусым пӱтынек вашталташ 500 миллиард наре теҥге кӱлеш маныныт. Вес семынже 9 тӱжем трамвай ден троллейбусым вашталташ 494 миллиард теҥгеш шуэш. Республике кугу субъект огыл гынат, кодшо ийын регионлаш колтымо 250 транспорт гыч лужым Йошкар-Олаш кондымо ыле. Республикым вуйлатыше палемден: кызыт транспортым налме кок йӧн ончалтеш. Инфрастуктура бюджет кредит да лизинг йӧн полшымо дене. Транспорт министр Александр Герасименко палемден: апрельыште транспорт министерстве бюджет кредит кышкарыште вич у троллейбусым налаш 133 миллион теҥгем ойыраш йодмашым колта. Сбербанк дене тений эше лу троллейбусым лизинг йӧн дене налаш йодышым рашемдыме. Глава шижтарен: троллейбусым налме годым ик стиль дене оформитлымым да технический характеристикыжым арален кодаш тыршыман.
             Фото: Марий Элым вуйлатышын организаций да аналитик виктемже.