Марий Элысе ончычсо рекорд марте ик секунд гына ситен огыл

             Ныл ий ончычсо рекорд деч Марий Элысе куштылго атлеткым ик секунд гына ойырен. «Марий Эл Арена» манежыште кодшо кечылаште 16-18 ияш марте рвезе да ӱдыр- влак коклаште куштылго атлетике дене республикын первенствыже эртен. Таҥасыше- влак коклаште спорт школлаште, Йошкар-Ола, Волжск, Медведево район гыч тунемше- влак лийыныт. Нуно шым кужыт дистанцийыште, кужытыш да кӱкшытыш тӧрштылмаште, эстафетыште таҥасеныт. Эн кугу лектышым 16 ияш марте ӱдыр-влак коклаште 200 метрыш куржмаште ончыктеныт. Шойбулак школ гыч спортсменка Мария Чеботарёва 26,93 шӱдаш секунд дене ончыко лектын. Лач тудо гына икымше разрядан нормативым шуктен. Тиде ийгот коклаште 1983-шо ийыште шындыме Марий Элын эн кӱкшӧ лектышыжым ончыктышо Лариса Зиминан результатше деч Чеботарёвам иктат 3 луаш секунд гына ойырен шога. Личный дисциплиныште сеҥыше- влак коклаште кокымшо разряд деч  удан огыл Юлия Конышева ден Станислав Коршунов (200 метр), Полина Домрачева, Алина Шушакова, Дмитрий Майков ден Иван Пекпаев (400 метр) Анна Москвичёва ден Алла Кораблёва (800 метр), Арина Атлашкина, Зарина Бицоева ден Вениамин Волков кӱкшытыш тӧрштымаште тыгай лектышым ончыктеныт.