Марий Элым вуйлатышын пашажым шуктышо Волжский районысо фермер- влаклан полышым пуаш сӧрен

         Марий Элым вуйлатышын пашажым шуктышо Волжский районысо фермер- влаклан полышым пуаш сӧрен. Тудо районыш паша дене мийымыже годым кресаньык-фермер озанлыклаш пурен лектын. Нунын кокла гыч иктыже Пӧтъялыште верланен. Тушто фермер Валериян Семёнов икмыняр ий пырчан культуро ден пакча- саскам ончен кушта. Фермерын мутшо почеш пытартыш ийлаште озанлык вияҥеш, тидлан кугыжаныш полыш йоным ышта. Тений Валериян Семёнов ныл миллион теҥге грантым сеҥен налын. Тиде окса дене мланде пашалан техникым, шурным аралаш оборудованийым налме. Тиддеч посна грант полыш деч посна озанлыклан 308 тӱжем теҥгем ойырымо. Кызыт озанлыкын курал-ӱдымо мландыже тӱжем наре гектарыш погына. Шурнылан йодмаш кушкеш. Тудым сурт-кайык фабрикыш, кугу ял озанлык предприятий- влаклан колтена,- палемден Валериян Семёнов. Юрий Зайцев тудын пашажлан туаштен ойлен.
              Грантым налше эше ик озанлык- Учимсола ял гыч фермер Андрей Пушкин. Тудо ковыштам, киярым, помидорым ончен-кушта. Тений тудо ныл миллион теҥге грантым налын. Оксам пареҥгым шындаш кумдыкым ешараш кучылтын. Техникыже тудын тӱҥ шотышто шкенан элыште ыштен лукмо. Паренгылан фасоватлыше комплексым да приёмный бункерым налын. Нуным 15-ше сентябрь марте конден шуктышаш улыт. Саскам тудо пошкудо кундемлаш, Москош да Моско областьыш колта. Юрий Зайцев Андрей Пушкинын пашам йӧратымыжым палемден да продукцийжым тамлен ончен. Озанлыкда вияҥже, а мемнан деч мо кӱлеш: грант, финансирований- ме полшена, - каласен Юрий Зайцев.
             Фото: Марий Элым вуйлатышын организаций да аналитик виктемже.