Мӱкшым кучымо у правил вийым налеш

           Шошо гыч мӱкшым кучымо у правил вийым налеш. Ял озанлык министерстве мӱкшым кучымо у ветеринар правилым пеҥгыдемден. Тудо шушаш ийын икмыше март гыч илышыш шыҥдаралтеш да 2028-ше ий 1-ше март марте вийыште лиеш. Тӧрлымаш- влак насекомыйын чержын шарлыме лӱдыкшым шагалемдышаш улыт. У йодмаш дене санитар обработкым  копшаҥгым, пудийым, колям ужмо годым але талукышто ик гана деч шагал огыл эртарыман. Карантинан мӱкш отарыште мӱкшым кораҥдымеке кажне гана ышташ тӱҥалыт. Озанлыкыш у мӱкш омартам, ӱзгарым, паша вургемым, йолчиемым кондымо годым обязательно дезинфекцийым ыштышаш улыт. Тыгак мӱкш отарым вераҥдыме шотыштат йодмаш- влак улыт. Нуно шыштым перерабатыватлыше предприятий, кондитер, химий продукцийым лукшо завод, аэродром, военный полигон, кӱртньӧ корно, электролиний полоса деч  шӱдӧ метр лишне верланышаш огытыл. Шулдыран- влакым вес отар гыч кондымо гын, ужатыше документше лийшаш. У мӱкш- влак карантиныште 30 деч шагал огыл кече лийшаш улыт. Насекомыйын куснылшо черже шарлыман кундемыште тӱшка кормушко ден вӱдым йӱктымӧ оборудованийым шындаш ок лий. Тыгак мӱйым погымо жапыште ветпрепаратым кучылтмо шотышто чарымаш- влак улыт.  Правил гыч корандыме ужаш- влакат улыт. Мутлан, мӱкш омартам канде, нарынче, нугыдо саре да ужар чия дене гына чиялташ лийме нерген йодмаш кораҥдалтын,- умылтара ял озанлык министерстве.