Волжскышто нылымше номеран школым капитально олмыктымо

               Волжскышто нылымше номеран школым капитально олмыктымо. Тудым «Туныктымо пашам вияҥдымаш» программыште шуктымо. Тиде пашалан 19 миллионат 800 тӱжем теҥгем кучылтмо. Нылымше номеран школ Волжскышто ик эн кугулан шотлалтеш. Тушто 956 йоча тунемеш. Школ директорын мутшо почеш школ шукертсек олмыктымашым вучен. Тудым 1981-ше ийыште чоҥымо. 40 ий жапыште ятыр коммуникацийже палынак тоштемын. Олмыктымо пашам тений июньышто тӱҥалме. У окнам, омсам шындыме, леведышым капитально олмыктымо, панель ушнымо верлам шымартыме. Тыгак вӱд пуч- влакым, ырыктыме системым вашталтыме, класс ден коридорышто у радиатор- влакым вераҥдыме, подвалымат олмыктымо. Йӱштӧ вӱдым шотлышо узелым вашталтыме. Пищеблокыштат кӱвар ден канализацийым ачалыме, вентиляцийым вашталтыме. Пашам икымше сентябрь марте ыштен шуктымо. Олмыктымо деч вара эше порядкым ышташ кӱлеш ыле. Тиде пашашке уло коллектив да ача-ава- влакат ушненыт. Ынде шошым школ воктелсе кумдыкым тӱзландараш тӱҥалыт.
              Фото: "Марийская правда".