Корным чоҥымо дене Марий Эл лу ончыл субъект радамыш пурен
Россий Федерацийысе кундемлаште корным чоҥымо дене Марий Эл лу ончыл субъект радамыш пурен. «Качестван лӱдыкшыдымӧ корно» калыкле проектым шыҥдарыме дене тенийсе ийын лектышыже почеш Российысе кундем- влак коклаште 8-ше ноябрьлан шотлымаште Марий Эл 6-шо верыште улеш. Корным чоҥымо паша, палемдыме кӱкшытыш шумо нерген таче Российысе кундемлам вияҥдыме шотышто Правительство комиссий Президиумын заседанийыштыже ойлымо. Тудым видеоконференцкыл йӧн дене Россий Правительство председательын алмаштышыже Марат Хуснуллин эртарен. Мероприятийыште Марий Элым вуйлатыше Александр Евстифеев участвоватлен. Вице-премьер тенийлан палемдыме корно пашам 100 процентлан шуктышо регионлам вуйлатыше- влалкан таум каласен. Марий Элыште корно шотышто калыкле проектын пашажым 2024-ше ийыште огыл, а 2023-шо ийыште мучашлыме планым ыштыме. Тенийлан палемдыме чыла планым шуктымо да эртарен темыме. Мутлан 19-ше ийыште 22 меҥгылан, 20-шо ийыште 30 уштышлан, тений 129 меҥгылан шукырак пашам ыштыме. Вес ийланат 100 процент контрактым пеҥгыдемдыме, 2023-шо ийлан 71 процент наре контракт ышталтын. Тений республикысе тӱҥ корнылам ышташ ныл миллиард утла теҥге оксам ойырымо ыле. Тенийсе лектыш почеш норматив дене келшен толшо регион кӱкшытан корно 18 процентым эрта, ола агломерацийыш пурышо корнын 52 процентше норматив деке лишемын. А 2017-ше ийыште улыжат кок процент корно гына норматив дене келшыше улмаш.