Тымарте ковид деч прививкым ышташ 350 тӱжем дозо вакциным кондымо
Республикышкына коронавирус инфекций ваштареш калыклан прививкым ышташ 350 тӱжем дозо вакциным кондымо. Тазалыкаралтыш министерствын умылтарымыж почеш, тынар вакциным прививке кампаний тӱҥалме годсек ситарыме. Кызыт калык кум тӱрлӧ кок компонентан вакцине дене пайдаланен кертеш: Гам-Ковид-Вак, Эпивак-Корона да КовиВак. Тазалыкаралтыш министрын алмаштышыже Юлиана Зейтулаеван мутшо почеш, ревакцинацийым ыштыше да КОВИД дене черланен лекше- влаклан ик компонентан Спутник лайт вакциным шындат. Тидын годым рашемден: моло еҥлан сай иммунитетым да аралтышым ышташлан, черланыдыме- влаклан кок компонентан вакциным ыштыкташ кӱлеш. Министрын алмаштышыже тидымат каласен: кажне вакцинын кучылташ лийме да лийдыме показанийже уло. Сандене кудыжым кучылташ врач палемда. Юлиана Зейтулаева ушуштарен: вакцинацийым ыштыме годым иммунный вашмут 42 кече жапыште виянеш. Сандене тиде жап мучко вакциным ыштыктыше- влакланат лӱдыкшӧ жаплан шотлалтеш. Тиде жапыште шуко еҥ коштман верыш мийыде, маскым чиен кошташ темлалтеш.