Лабораторийыште ужар шудо

Марий кугыжаныш университетын Аграрно-технологический институтыштыжо эксперимент шотан лабораторийым почыныт. Тудым почмаште Республикысе ял озанлык министр Андрей Кондратенко лийын. Тиде лабораторийыште микрозеленьым куштат. Ужар шудо идалык мучко шочын кертше манын, тушто южын температурыжым, вӱдыжгылыкшым шотыш налын, чыла йӧн ышталтын. Тушто ӱдымӧ нӧшмӧ шытен лектеш да арня гыч ужар шудыш савырна. Кызытеш тушто укропым, петрушкым, базиликым, горчицым, редисым, ужар шоганым, мелисам да молымат куштат. Чыла тидым студент кочмыверлаште, тыгак эмым ыштымаште кучылташ лиеш. Автоматизированный системым кучылтмылан кӧра нӧргӧ кушкыл-влакын атыланымыштым дистанционнат эскераш лиеш. Тылеч посна лабораторийыште оласе калыклан ешартыш шинчымашым пуымо шотышто программым да тӱрлӧ шанче проектым илышыш шыҥдараш йӧн уло.