Кодшо ийын 117 самозанятый еҥлан кок миллион утла теҥгеаш полышым пуымо

                 Марий Элыште 2021-ше ийыште 117 самозанятый еҥлан кок миллион утла теҥгеаш полышым пуымо. Изи да кыдалаш амалкалче пашалан полышым пуымо шотышто Российысе регион-влакын пашаштым Россий правительстве председательын икымше алмаштышыже Андрей Белоусовын эртарыме совещанийыште каҥашыме. Тудын пашаштыже Марий Элым вуйлатыше Александр Евстифеев участвоватлен. Совещаний видеоконференцкыл режим дене эртен. Тачысе кечылан республикыште 19 тӱжем утла изи да кыдалаш предпринимательствын субъектше шотлалтеш. Тушто 72 тӱжем еҥ пашам ышта. Але предприятий ден организацийлаште пашам ыштыше еҥын 29 процентше лиеш. 2024-ше ий марте тиде аланыште тыршыше- влакым 85 тӱжем утла еҥ марте шукташ палемдыме. 2020-шо ий мучашыште самозанятый еҥ- влаклан у специальный налог режимым пуртымо- «Профессионал парышлан налогым». У режимым шукерте огыл гына пуртымо гынат тений идалык тӱҥалтышлан 9 тӱжем еҥым официально регистрироватлыме. Тидыже прогноз значений деч кок пачашат пеле гана шукырак. Нунылан пашам ышташ йӧным саемдыме проект кышкарыште 117 еҥлан полышым пуымо. «Мой бизнес» рӱдер амалкалче пашам тӱҥалаш шонышо 790 еҥлан полышым ыштен. Тиддеч посна бизнеслан вияҥаш тӱрлӧ велым ятыр полыш пуалтеш.