Йошкар-Оласе ТЭЦ Медведевым «ырыкташ» ямдылалтеш
Йошкар-Оласе кокымшо ТЭЦ Медведевымат ырыкташ тӱҥалеш. «Т Плюс» компаний М-7 тепломагистральым чоҥымо пашам умбакыже шуя. Тений идалык мучаш марте Йошкар-Ола да Медведево кундемыште кок пучан ик меҥге кужыт наре трубопроводым пыштышаш улыт. Тиде пашалан 52 миллион теҥге оксам ойырымо. Проектым ыштымаш посёлкын нагрузкыжым Йошкар-Оласе кокымшо ТЭЦ ӱмбак кусараш полша да чоҥымо у пӧрт- влакым шокшым ситарыше рӱдӧ системыш ушаш йӧным ышта. Кызыт оласе ужашыште мланде ӱмбач 238 метр пучым шупшмо. Тидын годымак мланде йымачат пучым пыштат. М-7 тепломагистральыште пашам кызытсе жаплан келшыше материалым кучылтын ыштат.