Шочмын социал тӧнежлаште шокшо лиеш
Шочмын Йошкар-Оласе йоча сад, школ, эмлыме верлаште шокшо лиеш. 23-шо сентябрь гыч олтымо тургымлан ямде улмо шотышто документым налше йоча сад, школ, тӱвыра да тазалыкаралтыш тӧнежлашке шокшым пуат. Ола администрацийыште умылтарыме почеш, шокшым пуымо шотышто пунчалым олан мэрже Евгений Маслов таче пеҥгыдемден. Молан манаш гын, южын температурыжо палынак волен. Йошкар-Оласе икымше ТЭЦ-лан, «Т Плюс» комапнийын «Марий Эл да Чуваший» филиалжылан тыгай кӱштымашым да темлымашым колтымо. Шуко пачеран пӧртлашке, палемдыме нормо дене келшышын, вич кече мучко южын температурыжо 8 градус лишне шога гын, тунам шокшым пуат.