Йошкар-Олаште лишыл жапыште кум у чапкӱ лийшаш

Йошкар-Олаште лишыл жапыште кум у чапкӱ лийшаш. Марий калыкын лӱмлӧ тӱвыра да мер пашаеҥышт: Иван Петров, Андрей Эшпай да Валентин Колумблан чапкӱм ышташлан конкурсым иктешлыме. Тушко 13 йодмаш пурен ыле. Тӱвыра министерствын увертарымыж почеш, эксперт- влак келшен толшо кумдыкым, архитектурно-планировочный решенийым, художество кӱкшытым, аныкан улмым да кызытсе жапыште ышташ лиймым шотыш налыныт. Тыге икмыняр сеҥышым ойырен налме. Эн сай- влак коклаште автор- влакын пырля пашашт улыт. Владимир Карпеев ден Сергей Говорковын Иван Петровлан, Анатолий Медведев ден Сергей Говорковын Андрей Эшпайлан, Анатолий Ширнин ден Сергей Яндубаевын Валентин Колумблан ыштышаш чапкӱ проектым ойырымо. Икымше шарнымашан кӱым пыштыме церемоний икымше октябрьыште Андрей Эшпайлан вераҥдалтшаш чапкӱ олмышто лиеш. Композиторлан шарныктышым Пушкин уремысе 26-шо пӧрт, Республикысе тӱвыра да сымыктыш колледж воктене вераҥдат.

Фото: Пётр Васильев