Зинон Прохоровын подвигшым уэш ончыктеныт
Волжский районысо Купсолаште 1944-ше ий 19-ше сентябрьысе кредалмашым ыштен ончыктеныт. Районышто Кугу Ачамланде сарыште калыкын подвигшылан пӧлеклалтше мероприятий- влак умбакыже шуйнат. Шнуй Юмынаван Покрожо лӱмеш храм негызеш регионысо кокымшо военно-полевой сбор эртен. Тушто Кугу Сеҥымашлан пӧлеклалтше тале кредалмашым уэш ыштен ончыктеныт. Мероприятий Кугу Олыкъялыште шочшо Совет Ушемын Геройжо Зинон Прохоровым шарныме лӱмеш лийын. Тудо 1944-ше ий 19-ше сентябрьыште подвигым ыштен- тушманын амбразурыжым шке капше дене петырен. Сборыш Киров, Озаҥ, Альметьевск, Набережный Челна, Волжск, Канаш, Зеленодольск, Башкирий гыч казак ушем- влакын группышт толыныт. Нуно тактико-специальный ямдылалтмаш, зданийым налмаш, щит дене пашам ыштымаш, медицина ямдылалтмаш, ориентирований, курыкыш кӱзымаш дене моштымашыштым ончыктеныт. Ийготыш шудымо- влак автоматым рончен-погеныт, кӱзым кышкеныт пневматик сар-курал гыч лӱйкаленыт. Кажныштыже сеҥыше- влакым палемдыме. Кокымшо кечын чодыраште сарын кузе кайымыжым ончыктеныт. Чыла группыжат шкеныштым чолган ончыктеныт.