Республикыште кок у школым чоҥымо йодышым каҥашыме
Республикын правительствыштыже концессионный соглашений кышкарыште кок школым чоҥымо радамым каҥашыме. Республикым вуйлатыше Александр Евстифеев правительствын еҥже- влак дене кугыжаныш да частный партнёрство йӧн дене тунемме тӧнежым чоҥымо йодышым каҥашыме. Республикым вуйлатыше ушештарен: Килемар районышто Кугу Памъялыште Кумья кыдалаш школым да Татьяна Иштрикова лӱмеш «Канде кайык» гимназийын у зданийжым чоҥымо йодышым банкын еҥже- влак дене каҥашыме. Концессионный соглашенийын проектшым радамын лончылыман. Ик велым туныктымо пашам эртараш школышто мо кӱлешым туныктыш министерстве аклышаш, кокымшыжо- техничсекий параметр дене вашмату лийшаш, кумшо финанс министерство окса шотышто чыла шотлен лекшаш. Кумья школ федерал программы шок пуро. Молан манаш гын, зданийым чоҥымо деч посна коммуникацийымат ыштыман. Сандене концессий почеш чоҥымаш йӧнан лийшаш. Оласе школ нерген ойлаш гын, Сбербанк 550 верлан келшыше школын проектшым ойырен налын. Глава концессий соглашений почеш чоҥен шуктымо моло регионысо проект- влакымат ончен лекташ темлен да документын ямде редакцийжым ямдылаш кӱштен. Пашаче группым вуйлаташ Михаил Васютинлан кӱштымӧ. Ушештарена: Кумья школ 1930-шо ийлаште чоҥымо вич пу пӧртеш верланен. У йӧн дене чоҥымаш лишыл жапыште у школым нӧлташ полша, а кугыжаныш погыш 15 ий гыч кусна. Тиде жапыште банк гарантий почеш тудлан мутым куча, а йоча- влак у школышто тунемаш тӱҥалыт. Гимназийым тыге чоҥымашат школышто вер ситыдымашым шагалемдаш полша.
