Йошкар-Олаште тений 45 пӧрт уэмшаш
Капитально олмыктымо программе почеш Йошкар- Олаште 45 пӧртыштӧ олмыктымо пашам ышташ палемдыме. Нуно ола администрацийын контрольыштыжо улыт. Теҥгече специалист- влак нине пӧртым терген лектыныт. Капитально олмыктымо программе 2014-ше ийыште тӱналтышым налын. Тиде жапыште 204 пӧртым олмыктымо. Тидлан 946 миллион теҥге кучылталтын. Пытартыш ийлаште пӧртым шукырак тӧрлаш тӱҥалме. Кодшо ийын шуко пачеран 62 пӧртыштӧ 330 миллион теҥгеаш пашам шуктымо. Тений 313 миллион теҥгелан 45 пӧрт олмыкталтшаш. Кызыт 2020-2022 ийлан планым ыштат.