Мӱкшызӧ ден ял озанлык пашаеҥ-влак ваш умылен пашам ыштышаш улыт
Тений кеҥежым Марий Элыште да Российысе ятыр кундемыште мӱкшын тӱшкан колымыжо рашемын. Ик амалжылан пасум пестицид дене аяртымаш шотлалтеш. Сандене Россельхозцентрын республикысе филиалже ял озанлык предприятийлам вуйлатыше ден специалистше- влаклан ушештара: мӱкшым да мӱкш сатум пестицид дечын аралаш манын, СанПиН дене келшышын, пасум да моло кушкылым кастене, мландӱмбалсе оборудований дене обрабатыватлыман. Тиддеч ончыч мӱкш отарым кучышо- влаклан радио, газет, телевидений, электрон СМИ гоч могай препаратым кучылтмо да мӱкшым эр-эрденак лукташ огыл манын увертарышаш улыт. Мӱкшлан эн лӱдыкшыжӧ инсектицид шотлалтеш. Пестицидым кучылтмо технологийым пеҥгыдын шуктымо шотышто мутым ял озанлык предприятий, фермер озанлык да посна озанлык- влакын специалистышт кучат. Пестицид лӱдыкшӧ шотышто кум тӱшкалан шелалтеш: чот лӱдыкшӧ, икмарда лӱдыкшӧ да чот лӱдыкшӧ огыл. Кажныжым кузе кучылтмо шотышто инструкций уло. Мӱкш оза- влакат шке жапыштыже ял илемлам, озанлыклам мӱкш отарышт кушто верланыме нерген увертарышаш улыт. Пестицид дене пашам ыштышаш нерген уверым налмеке, мӱкшышытм 5-7 меҥге торашке наҥгайышаш улыт. Тидым ышташ ок лий гын, летокым сетке дене петыраш кӱлеш, кормушкыш сиропым да вӱдым шындыман. Наҥгайыме мӱкшым 7-10 кече гыч гына кондаш лиеш. Мӱкш колымаш вашлиялтеш гын, ветеринар службыш увертыман.