Куженер районышто виктарен колтымо ик йодыш весым шочыктен
Ик йодышым виктарен колтымо дене вес йодыш шочын. Куженер районысо Йырмарий ялысе калык шукертсек Шой Шудымарий ял дене ушышо корным чоҥаш йодын ыле. Тиде йодыш дене Республикым вуйлатыше декат шуыныт. Лектыш уло. Транспорт министерствылан кеҥеж жапыште корным ыштен шукташ кӱштымӧ. Пашан акше 53 миллион теҥгем эртен. Кызыт корнышто паша уло куатын кая. Рокым оптымо, ӱмбакыже вашке тыгыде кӱ вочшаш. Корнын кумдыкшо 10 метрыш шуэш. Икымше сентябрьлан ыштен шуктыман да школ маршрутыш пуртыман. Тыге чыла сайла коеш. Но тидын годымак вес йодыш лектын. Ончыкыжым тиде корным кӧ кучаш, ончаш да тӧрлаш тӱҥалеш. Тудым кучымылан окса роскотым Шой Шӱдымарий ял идемын балансышкыже пуаш шонат. Телым тиде корным ял мучаш марте гына эрыкташ палемдыме, а ял гоч шуйнышо ужашыжым кӧ эрыкташ тӱналеш- пале огыл. Верысе кучемын тымартеат оксаже уке ыле. Сандене ялысе калык адак кӱшыл кучем дене йодмаш дене лекнеже. Нуно тиде корным Куженер районын балансышкыже кусараш йодыт.